राज्यातील शिक्षण व्यवस्थेमध्ये शैक्षणिक, व्यावसायिक आणि क्रीडा प्रशिक्षणाचा समावेश आहे. शालेय शिक्षणानंतर महाविद्यालये आणि विद्यापीठांमध्ये उच्च शिक्षणाच्या अनेक संधी उपलब्ध आहेत. सर्व वयोगटातील सज्ञान व्यक्तींसाठी राज्यात व्यावसायिक शिक्षणाचे अनेक पर्याय उपलब्ध आहेत. या व्यावसायिक शिक्षण देणाऱ्या विविध संस्थांमधून संगणकाबरोबरच सुतारकाम, धातूकाम, वेल्डिंग अशा विविध क्षेत्रांशी संबंधित प्रशिक्षण दिले जाते. राज्यातील औद्योगिक प्रशिक्षण संस्था आयटीआय या नावाने सुपरिचित असून त्या औद्योगिक प्रशिक्षण देणारे विविध अभ्यासक्रम राबवितात.

नीती आयोगाने प्रसिद्ध केलेल्या आकडेवारीनुसार शिक्षणाशी संबंधित क्रमवारीत देशातील राज्यांमध्ये महाराष्ट्र सातव्या स्थानावर आहे.

राष्ट्रीय शिक्षण संशोधन आणि प्रशिक्षण परिषद - NCERT शालेय शिक्षणासाठी राष्ट्रीय स्तरावरील सामाईक आराखडा आणि अभ्यासक्रम तयार करते. राज्याचा शिक्षण विभाग त्यावर आधारित आणि महाराष्ट्रासाठी अनुरूप असा अभ्यासक्रम तयार करतो. बालभारती ही राज्यस्तरीय संस्था शालेय पाठ्यपुस्तकांची छपाई आणि वितरणाचे काम करते. महाराष्ट्र राज्य माध्यमिक आणि उच्च माध्यमिक शिक्षण मंडळातर्फे घेण्यात येणाऱ्या इयत्ता दहावी आणि बारावीच्या परीक्षा हा विद्यार्थ्यांच्या शैक्षणिक जीवनातील महत्त्वाचा टप्पा मानला जातो. सरकारी आणि खाजगी शाळा तसेच महाविद्यालयांच्या आणि संस्थांच्या माध्यमातून शालेय, उच्च तसेच व्यावसायिक शिक्षण दिले जाते.

महाराष्ट्रातील शालेय शिक्षणाबद्दल अधिक जाणून घेण्यासाठी भेट द्या.